政情：3‧11立會停沖廁 預示補選難衝刺？
立法會四席補選將會喺下周日，即係三月十一日舉行，各候選人都密鑼緊鼓造勢兼宣傳，兩陣對壘最後衝刺。之不過，立法會秘書處尋日向全體議員發出通告，話下周日立法會無得沖廁。換言之，即係坐廁無水抽，到底係寓意冇得「衝刺」，定係叫班議員乖乖聽話唔好亂「抽水」呢？
或暗喻咪亂「抽水」
立法會秘書處喺通告寫明，立法會綜合大樓喺下周日上午九時至下午六時暫停沖廁水供應，到時會關閉部分洗手間，而可以使用嘅洗手間內，就會放置水桶供沖廁之用。唔通立法會秘書處想預先同班新丁講，入到嚟立法會唔可以亂「抽水」，做事要親力親為？