青年事務委員會尋日開最後一次會議，並通過「香港青年發展策略公眾參與報告」，當中提到唔少人都覺得學生學業壓力過大，仲建議教育局去諮詢教育界同相關組織同委員會，去搵出學生喺學業上壓力大嘅原因。學生學業壓力大唔使青委會講，相信好多人都知。青委會為咗份報告舉辦咗一百零五場大小討論，搞場大龍鳳，講埋啲「阿媽係女人」嘅道理，又冇解決方法，認真無厘頭。
青委會受政府委託，喺舊年五月至十月舉辦青年發展政策公眾參與活動，期間搞咗四場公眾交流會同一百零一場聚焦小組討論，以了解年輕人面對嘅問題。報告終於出爐，當中就指參與公眾活動嘅人認為學生學業壓力大，青委會就覺得同中學文憑試（DSE）成個系統有關，但係咪應該取消DSE，甚至基本能力評估（BCA），青委會就冇提出意見，淨係建議政府要搵出學生壓力來源。
青委會其他建議仲包括叫政府、私營界別同社會人士支援青年創業；由政府鼓勵私營機構提供多啲香港、內地及世界各地嘅實習機會；改善置業階梯等。
青委會喺發表報告後就完成佢哋嘅「歷史使命」，並將由現屆政府去年施政報告中宣布成立嘅青年發展委員會去繼續有關工作。不過，青委會部分人士好大機會會過渡至新嘅委員會，新瓶舊酒下都唔知新委員會搞得出啲乜嘢喇？