政情：校董鬧爆中大生公然設學會播獨
一度引起各界關注同討論、由幾個香港中文大學學生共同籌組嘅香港獨立研究學會（港獨學會），唔聲唔聲已經成立咗兩個月，仲話嚟緊會搞吓論壇、電影會等活動，要畀中大學生可以「名正言順」咁討論港獨。兩名身兼中大校董嘅立法會議員劉國勳同何啟明，鬧爆呢個港獨學會喺校園公然播獨，促請中大校方繼續關注學生會、港獨學會嘅動向，如發現任何宣揚港獨嘅行為，都應該出面阻止。
呢個港獨學會喺今年一月成立，亦喺社交網站Facebook專頁上匿名招募幹事同會員，引發外界關注，殊不知事隔兩個月港獨學會已進入「試辦期」。成立呢個學會嘅意念係由五、六個中大學生萌生，而中大學生刊物《大學線》最新一期月刊就訪問咗港獨學會嘅籌委會成員兼候選幹事之一、就讀工程學院嘅KC，喺訪問中話嚟緊會搞吓論壇、電影會等活動，要畀中大學生可以名正言順咁討論港獨，冇理由講都唔畀講咁話喎！
行藏鬼祟 拒露面提供資料
喺訪問中又提及，港獨學會係中大學生會屬下團體委員會轄下嘅學會，當時中大曾經要求學生會提供港獨學會嘅資料，但學生會以申請合乎程序為由拒絕透露。而港獨學會所有成員都相當神秘，由始至終都拒絕露面訪問，雖然提到以後會搞活動，但話至少喺「試辦期」內都唔會公開露面，活動會搵其他人士幫忙主持活動，盡量隱藏身份，要保障自身安全咁話。話時話，港獨學會一方面提出港獨可以喺中大校園名正言順討論，另一方面就行藏鬼鬼祟祟、左閃右避喎。
校園播獨可能一發不可收拾，劉國勳直指港獨學會已經唔係政治立場嘅問題，而係違法嘅問題，強調港獨違反《基本法》同一國兩制，所以除咗校方要有所關注外，學生會都應該主動處理，而唔係以合乎程序包庇港獨學會。
何啟明：已超言論自由界線
何啟明就提到中大校長段崇智上任時已經講過港獨係不能接受，認為中大應該繼續跟進，向港獨學會施加壓力，阻止港獨喺校內入面蔓延。佢又批評學生會偏袒港獨學會，認為公然有組織研究港獨已經超出咗言論自由嘅界線，要求學生會出嚟面對公眾嘅批評。