中環出更：食海味創意多 潘權輝：試過配咖喱
香港人近年多咗唔少人注重健康，其中進食海參、花膠等海味都能夠有保健嘅功效，尋日喺稻苗學會新春團拜見到香港餐務管理協會永遠會長潘權輝，原來佢都有呢個習慣，間中仲會出現咖喱海味呢啲創意配搭，真係變化多端喎。
點解會食到咖喱海味？潘權輝話因為外傭唔太識得點樣烹調海味，所以先會創出特別海味配咖喱，更試過番茄薯仔配海味，但佢就話味道都唔會奇怪，睇嚟已經習以為常。另外，佢都直言香港人愈食愈健康，所以佢上年生產臘腸都減少咗兩成用鹽，而且顧客反應更佳添！
出席團拜嘅除咗有主人家主席邱金榮、第一副主席徐汶緯、秘書長程少儀同會長黃傑龍外，當然有香港餐務管理協會會長楊位醒等飲食業界嘅人士到場支持。
早前消委會就發現，唔少米線鈉含量超標，從事米線生意嘅邱金榮就指出米線味道淡，所以一定會加入大量濃味食材，如果要減少鈉含量，就可以用自然食材去代替鹽，好似湯底可以改用昆布喇！
徐汶緯常試菜 冇得偏食
另外，唔少人都有偏食問題，咁從事飲食業嘅人士又會唔會偏食呢？徐汶緯就斷言飲食界人士唔可以偏食，因為要經常進行試菜，根本冇得避。而以前唔鍾意榴槤質感嘅佢，都曾經為研發榴槤布甸而食榴槤，睇嚟呢個真係好大嘅挑戰喎。
而程少儀都有同樣嘅經歷，佢話以前因皮膚同腸胃差，所以唔會食牛肉、海鮮同辣嘅食物，但入行後經常要試菜，發現揀飲擇食等於冇嘢啱食，加上身體經中醫調理後有所改善，所以現時就冇晒偏食問題喇！
卓妮