政情：簡汝謙呻航班延誤盼高鐵港段通車
市民遇上航班延誤，搞到行程受阻，真係令人頭都大晒，國際青年商會香港總會會長簡汝謙早前出席活動時自爆，試過一次經上海再去日本，撞正香港去上海嘅航班延誤，搞到錯過埋去日本嘅飛機，當時真係唔知點算好，佢認為，如果日後廣深港高鐵香港段通車後，相信會更容易預算時間，咁就可以減少呢啲尷尬情況喇。
毋須擔心一地兩檢
之不過，高鐵香港段能否如期於今年第三季通車，關鍵係一地兩檢方案係咪趕及立法會暑假休會前通過，身為律師嘅簡汝謙話，依家最大嘅爭議唔係法律方面，而係市民嘅心理關口，因為之前冇先例喺香港嘅核心地區劃出一個內地口岸區，但佢相信，內地有關方面已講明只會喺指定範圍內執行，市民都唔使為此過分擔心。