政情：謝偉俊去古巴 睇人整雪茄
美洲國家古巴近年陸續對外開放，吸引唔少港人到當地旅遊，立法會議員謝偉俊（Paul）於農曆新年期間聯同一班朋友去咗古巴、墨西哥等國家，除咗睇吓舊建築物同舊車，仲特別去睇農村啲人點樣整雪茄。Paul話，當地嘅雪茄特別平同新鮮，可惜唔帶得返香港，因為帶多過一支就要打稅。
趁難上網與世隔絕
去到古巴，當然唔少得睇古巴革命領袖哲古華拉，Paul話，當地有好多哲古華拉嘅相同衫，連大型建築物都有哲古華拉，又透露買咗個印有哲古華拉嘅雪茄樽，準備送畀成日着哲古華拉衫現身嘅前議員梁國雄。
港人一向手機不離手，不過於古巴就未必可以嘞，因為當地網絡不發達，要喺特定地方才能上網，Paul話當地酒店都有得上網，但佢覺得上網好貴，所以趁機與世隔絕。Paul又提及，古巴畀人覺得唔安全同落後，但今次親身到訪就覺得古巴音樂好聽，當地人亦好開心同好享受生活喎。