政情：競逐街市小組職位 尹兆堅雙輸
公眾街市係市民購買新鮮食物嘅主要途徑，外界一直關注當局點樣改善公眾街市營運環境，立法會研究公眾街市事宜小組委員會（街市小組）尋日舉行首次會議，選出街市小組正副主席，民主黨尹兆堅先競逐主席，但僅得六票，輸咗畀取得九票嘅民建聯柯創盛，而尹兆堅其後再接再厲挑戰副主席職位，今次只得五票，輸畀取得十票嘅工聯會何啟明，尹兆堅雙輸收場，建制派成功包攬街市小組正副主席。
建制包攬正副主席
尹兆堅事後形容，挑戰正副主席落敗係意料中事，始終建制派人數較多，所以好難爭贏，但佢同時提及，由於街市發展屬於民生議題，內容較少爭議，直指若然建制派反對佢提嘅意見，其實會影響全港用緊街市嘅市民權益，所以唔擔心會有好大阻力。
尹兆堅續指，唯一擔心嘅係街市小組討論嘅議題有冇「命中紅心」，例如針對街市未來嘅規劃、政府預留二十億優化街市嘅實質用途等。