政情：容海恩警惕網上戀情識破騙徒邀請
網上情緣騙徒無孔不入，連立法會議員容海恩（Eunice）都慘成目標之一。Eunice尋日喺立法會自爆，有來自社交網站嘅懷疑假帳戶邀請佢成為朋友，因為對方同Eunice有部分「共同朋友」，好易令人不虞有詐，不過Eunice最後都冇上當。還記得有術數師早前就幫Eunice算過，就算佢今年有「桃花」都好難成事，即使遇到合心水嘅對象似層層咁，都只係曇花一現，甚至「見光死」，唔通Eunice係將術數師嘅說話擺在心上，因此對網上情緣打定輸數，所以先意志堅定冇受騙？
「交友量設限 費事嘥配額」
立法會一個事務委員會尋日開會，Eunice於會上自爆有「假四叔」喺社交網站邀請佢做朋友，不過佢就覺得對方流流地，所以冇接受對方做朋友。佢自言作為議員，都想多啲人認識自己，但基於社交網站交友數量有上限，嚟啲明顯似假帳戶嘅就冇加為朋友，費事「嘥quota（配額）」咁話。
據警方資料顯示，近年接獲嘅網上情緣騙案上升，大部分受害人都係女仔，據報受害人唔止畀人呃走積蓄，仲可能欠下一身債。Eunice話，自己都好同情網上情緣騙案嘅受害人，因為佢哋唔止畀人呃錢，仲呃埋感情，真係「呃乜都有」，本身係大律師嘅Eunice都試過幫女事主循民事訴訟追討番啲錢。
雖然感情冇咗，追討番啲錢都唔至於人財兩空，Eunice分析，其實好多呃錢嘅男人本身都係冇乜錢，真係想追討都好難，Eunice認為，警方真係要加強宣傳，唔好令單身或失婚嘅女士誤墮圈套啦。
Eunice最後更溫馨提示一眾姊妹，話網上交友喺呢個年代已經好普遍，喺網上識人要好小心，始終要見過面先知係乜料，如果真係要見面，就最好搵埋朋友陪同，喺安全地方見面至得喎。
話時話，Eunice早前話過以後拍拖，會拉埋單身嘅工聯會議員麥美娟（Alice）出街，若然佢真係要出動見網友嘅話，唔知首選係咪會搵Alice陪伴兼做軍師呢？