中環出更：公民教育新宣傳片 面世要等埋《國歌法》
每日免費電視播放晚間新聞前都會播放國歌宣傳片，之不過呢段宣傳片已係早年製作，公民教育委員會（委員會）於一五年商討製作新嘅國歌電視宣傳片。不過，委員會尋日舉行一七至一八年度最後一次會議，會上就交代新宣傳片仲未可以推出，原來係同政府將就《國歌法》進行本地立法有關。
要參考本地立法內容
根據委員會秘書處於會上匯報，委員會同青年事務委員會聯合成立國歌電視宣傳片工作組，有關製作工作已經開展，承辦機構聽咗小組意見後，仲修改宣傳片初步剪接本。不過，由於政府將就《國歌法》本地立法，所以宣傳片工作先煞停，因為要先參考本地立法內容先可以完成製作。
委員會轄下嘅國民教育小組召集人胡健民補充，需要等待《國歌法》完成本地立法工作，先會有新宣傳片面世，因為有關本地立法嘅內容緊要，委員會委員都覺得有需要參考，形容呢個係恰當做法。
其實全國人大常委會去年底把《國歌法》納入香港《基本法》附件三，須經香港本地立法才實施，政制及內地事務局局長聶德權預告，政府最快本月到立法會政制事務委員會聽取意見，目標係暑假前提交《國歌法》草案，由於立法會審議草案需時，委員會嘅新宣傳片應該唔會短時間內面世嘞！
卓妮