中環出更：阮偉文擔心傳統服飾失傳
中國人講好意頭，唔少人都會喺農曆新年着具中國特色嘅傳統服飾，或者着鮮艷顏色嘅衣服以配合喜慶氣氛。不過香港係中西匯聚之地，都有唔少人鍾意着西服。早前喺一個新春團拜活動上見到香港女童軍總會副會長阮偉文，佢就以西裝示人。佢擔心傳統服飾會失傳，因為造衫老師傅買少見少喎！
阮偉文話，男士有唔少中式傳統服裝可以選擇，好似長衫馬褂、中山裝等，佢發覺依家確實少咗人着中國傳統服飾，原因之一係造衫嘅老師傅年紀漸老。好似佢以往幫襯開嘅師傅就已離世，難怪佢會擔心呢門傳統工藝失傳喇！
陳曦齡偏好買現成連身裙
當日為香港女童軍總會團拜，香港總監李周美枝同一眾副會長包括陳曦齡、邱吳惠平同郭羅桂珍等人都有現身，仲有名譽副會長方劉小梅同王嘉恩、執委李騰駿等人。陳曦齡當日着咗黑色連身裙出席活動，不過裙上就有繡花圖案，隱約帶着中國風。陳曦齡笑稱自己平時打扮比較洋化，因為中式服裝要度身訂造先好睇，但係做一件衫要分幾次去度身、試衫同修改，所以佢偏好買現成嘅連身裙，比較慳時間咁話。
邱吳惠平讚外孫打扮得意
方劉小梅就着咗一件喺北京買嘅手工繡製嘅傳統服飾，衫上更繡有龍嘅圖案。佢話細個時過年一定會着全新衣裳，依家四個孫都會特登着新衫過年。有一對孖女外孫嘅邱吳惠平，就大讚佢哋新年時打扮成中國娃娃，夠晒得意添。
卓妮