港府奉行「守財奴」理財哲學，儘管政府庫房嚴重水浸，單是財政儲備已逾一萬一千億元，政府即使再無一毛錢收入也足夠兩年半開支，全世界睇怕冇乜邊個地方好似香港咁，錢多到漏油仍不肯還富於民。政府今個財年盈餘高達近一千四百億元，民間要求派錢之聲特別強烈，政府也不是不知道，卻堅持不派錢，一味抱殘守缺，廢噏所謂「理財新哲學」，自欺欺人要「投資未來，關愛共享」，結果又係派糖派到天怒人怨。
其實，狗年「關愛共享」就係人人派九千，唔派九千，派六千來個「六六冇窮」，亦可以讓市民開心高興吓！之但係，新一年度預算案派糖不均，觸發立法會跨黨派聯手向政府施壓，要求加碼派錢。財政司司長陳茂波無視滔滔民意，「大丈夫」話唔派就點都唔派，即使知衰，也只係話會透過關愛基金向三類得益較少嘅人士「補漏拾遺」。
有行會成員指出，關愛基金原意係協助社會較低層人士，不應因預算案派糖不周而貿然擴充涵蓋範圍，加上關愛基金須市民自行申請，如同增設關卡，「好似市民向政府乞求咁」。老朽雖然亦是「N無人士」，但要我申請關愛基金確係有啲難為情，情願免費報考中學文憑試，試吓自己中、英文程度有冇進步，或許一個唔覺意又攞到「星星」，到時在影響力勁揪嘅《東方日報》登段小廣告，話唔定華麗轉身變成「星級中文」補習老天王，屆時有機會完成置業夢也說不定，日後進身有差餉可免嘅中產，睇怕就唔會有咁多牢騷。
「在肓之上，膏之下，攻之不可，達之不及，藥不至焉，不可為也。」這是一則典型的「病入膏肓」故事。特區政府不聽民意，不理「與其補漏拾遺，不如全民派錢」之忠告，一錯再錯，剛愎自用，有錢到漏油卻只賺得罵名，能人所不能，都算極品！