政情：高球場吸投資者 鄭倫光：填海解住屋問題
公營房屋追唔上需求，基層市民唔知幾時先上到樓，社會各界都有好多唔同嘅建議去解決住屋問題，其中一個最具爭議嘅地點就係佔地一百七十公頃嘅粉嶺高爾夫球場，好多人話高球場佔地多，服務嘅人少，應該收番嚟起樓。
不過，歐洲亞洲華人高爾夫球協會名譽會長鄭倫光就話香港作為國際城市，高球場係可以吸引外來投資者嚟香港投資嘅工具，加上香港嘅高球場少到一隻手數得晒，如果再cut多個，咁會令香港打高球嘅人愈嚟愈少。
稱有大片草地 助改善環境
咁住屋問題點解決先？佢就話填海應該係最理想嘅做法，雖然有人話填海對環保有影響，但佢認為保留高球場係有助改善環境，始終高球場擁有一大片草地，亦都會種植唔少樹木，而舊時可能都仲有人投訴用好多殺蟲水，但今時今日隨住科技進步，殺蟲嘅技術已經改善咗好多，所以保留高球場對環境其實係利多於弊，係值得保留嘅。