政情：超區議席被狙擊 梁耀忠 鄺俊宇連任危危乎
明年區議會就會進行換屆選舉，當中最為人關注嘅係以俗稱「超級區議會」嘅區議會（第二）（下稱：超區）進身立法會議員嘅人士，必須保留現有嘅區議會議席，先擁有參選超區嘅入場券，因此全部超區議員都被對方陣營狙擊，其中，街工梁耀忠（阿忠）同民主黨（白鴿黨）鄺俊宇（Roy）嘅對手都係來自民建聯（民記），而民記兩席就被傘兵狙擊，各個超區議員真係危危乎呀！
過往立法會選舉，兩名以超區身份當選嘅立法會前議員何俊仁同馮檢基，都係因為失去區議會議席，而無法再循超區途徑連任，其中何俊仁就冇再以頭位出戰地區直選，而馮檢基輸畀民記同工聯會雙牌頭小花嘅陳穎欣後，就轉戰新界西直選，可惜失敗，明年就係下屆區議會選舉，各區部署開始擬定，據知五名超區議員都已經有人預備喺區議會選舉中挑機。
林偉明對戰鄺保票倉
泛民方面，Roy所屬嘅北朗區，據知有民記社區主任林偉明已落區準備挑戰，仲喺新正頭出動派橙攻勢，有分析認為民記勝算唔係咁高，但該區一帶係民記喺立法會嘅票倉，所以不能放棄區選，以免影響下屆立法會選舉會跌票。
至於阿忠上次立法會選舉中，由地區直選空降選超區，近日有傳佢因為本屆立法會初期選主席事件，自覺支持度減低，想轉番新界西直選，據了解，阿忠嘅區議會選區都被民記小花狙擊，之前有傳可能會出戰興芳區嘅鄧麗玲，據悉最近有新安排，可能會轉去葵芳區同阿忠對戰，重現小花大戰老將嘅局面。另一區小花大戰老將嘅選區，就係涂謹申所屬嘅奧運區，據知獨立小花伍嘉敏已經落區，並已開設社交網站專頁，密謀挑戰。
周浩鼎遇到傘兵挑機
建制方面，民記兩名超區議員周浩鼎（Holden）同李慧琼都遇到傘兵挑機。據了解，上次區議會選舉，喺東涌南選區，Holden嘅傘兵對手王進洋一直冇離開過，相信下屆選舉繼續出戰嘅機會好大。翻查資料，上次Holden都係贏得二百幾票啫，若果王進洋再捲土重來嘅話，佢真係危危乎嘞！至於李慧琼所屬嘅土瓜灣北，附近一帶嘅九龍城範圍，據知已有傘兵落去試水溫，而呢批人同立法會議員朱凱廸等人相熟，相信一定會安排成員落去挑戰李慧琼。