中環出更：攬職場熊貓 陸頌雄賣萌
唔好以為淨係小朋友先鍾意攬毛公仔，原來立法會勞工界議員陸頌雄都一樣o架！話說陸頌雄日前喺社交網站Facebook 上載咗一張相，就係佢攬住隻大熊貓，仲大讚隻熊貓公仔「真係好卡哇伊呢」（可愛），認真大唔透。唔通佢都喺度賣萌？咁又唔係喎，原來隻熊貓公仔有特別意思嘅。話說佢嗰日係出席香港文職及專業人員總會（文專總會）新春團拜，而呢隻熊貓就係文專總會嘅吉祥物——職場熊貓。
網民讚吉祥物似足打工仔
點解係熊貓？因為工會關注工時過長，導致休息不足同欠缺運動導致肥胖問題，所以要一齊爭取標準工時、十七日法定假期，生活工作要平衡咁話。呢張相出咗之後，有網友即刻話熊貓又幾有代表性喎，事關打工仔做到面冇血色，兩隻黑眼圈，工時長，缺運動，以致肥胖，引發慢性病；另有網友留言話：「有標準工時，熊貓都變北極熊。」
之不過，依家勞資雙方仲未就標準工時拗掂數，打工仔都唔知要等到何年何月嘞！
卓妮