中環出更：李和聲拉古董京胡 賓客享「太后級」禮遇
上海總會（總會）早前喺中環會所舉行春茗，仲安排一連串文藝表演。其中總會永遠名譽會長李和聲特登出動私人珍藏嘅古董京胡，同一班樂手合奏曲目「夜深沉」，為晚宴帶來高潮。李和聲笑笑口話，嗰把京胡至少有二百年歷史，當年都曾為慈禧太后表演過。照咁講，一眾賓客咪享受咗「太后級」嘅禮遇？
九十一歲高齡嘅李和聲一向鍾意唱京劇，經常同一班老友玩票自娛，唱京劇要練氣，佢就當係健身，一舉兩得。今次公開拉京胡，係佢廿四年前喺中南海表演之後嘅第一次，難怪個個都聽出耳油。李和聲嘅兒子、總會理事長李德麟同埋孫子李惟宏都有到場，李惟宏喺過年前喜添一名BB女，唔使講，今個農曆新年梗係特別喜氣喇！
沈祖堯送饒宗頤大師墨寶
出席春茗嘅仲有總會副理事長高叔平同兒子高鼎國、中文大學前校長沈祖堯及上海海外聯誼會會長施小琳等人。沈祖堯專登送上一幅已故國學大師饒宗頤寫畀佢嘅墨寶「谷暖先春」，話要感謝總會多年嚟對中大學生嘅支持。佢卸任校長之後都好忙，經常到世界各地去考察癌症中心，為中大即將落成嘅私家醫院做準備。
李德麟細數過去一年活動
李德麟就細數總會過去一年嘅慈善活動，包括捐助教育、支持惜食、為長者同基層送暖等。佢仲報喜話晚宴前召開嘅理事會通過捐出三百萬元，為協康會位於葵芳嘅新幼稚園命名，冀助自閉症兒童融入社會。
卓妮