政情：社民連選行委會成員 在囚黃浩銘連任副主席
社民連尋日舉行會員大會，並選舉新一屆行政委員會成員。早前因為喺一四年佔旺期間違反法庭禁制令，被控刑事藐視法庭罪而遭判監四個月十五日嘅社民連外務副主席黃浩銘，雖然現時身在獄中，但仍競逐外務副主席一職，並成功連任。至於內務副主席一職，則由舊年中才加入社民連的社運人士周諾恆擔任。
吳文遠爆有職員「捱義氣」減薪
社民連過去以支持者捐助、眾籌等方式維持日常經費，該黨嘅梁國雄喺舊年被取消立法會資格（DQ），成功連任主席嘅吳文遠話該黨嘅財政係「掹掹緊」，雖然喺DQ事件後，籌款數字有增長，但只係勉強支撐組織嘅營運。被問到需要多少資金先夠營運，佢話「冇話夠唔夠，從來都係睇餸食飯」，又透露現時有職員「捱義氣」減薪。
社民連嘅行政委員會有十六人，今次改選當中有六人係新加入行委會，除咗周諾恆，亦有民陣前召集人岑子杰。近年社民連官非纏身，除咗副主席黃浩銘現時在囚，吳文遠話仍有三名成員面對訴訟，包括佢本人。問到有冇就入獄作心理準備，周諾恆話一直都有心理準備，而未來會唔會代表社民連參選，佢就話未有打算。