政情：搞亂照顧員護理員薪酬 李卓人變李屈人

靈實澄清 工作性質不同難比較

李卓人喺社交網站貼出一張喺勞工處刊登嘅招聘廣告，顯示靈實以月薪約一萬一千元，招聘助理照顧員，其職責係服務家居或日間中心長者嘅日常護理照顧工作，包括送飯、陪診及清潔。李卓人更放咗一張林正財嘅相，畫咗兩隻角同一個長鼻。李卓人指林正財曾經話過，依家加咗兩個薪級點畀安老院舍都請唔到人，鼓吹輸入外勞，但其所屬機構就用一萬一千多元請人，人工比社署薪級表嘅一萬四千幾元仲少，又形容助理照顧員係「巧立名目」嘅職級，做嘢就係護理員工作，認為佢剝削到盡，但公開又話加咗薪級點，係講大話。

靈實就兩次澄清，助理照顧員並非護理員，亦與院舍照顧員嘅工作性質不同，毋須過夜，就工作性質、學歷同經驗要求都唔同，難以相提並論，而靈實嘅院舍照顧員入職薪酬有約一萬五千元，遠高於社署所要求嘅一萬四千一百多元。靈實喺其中一次澄清中，更點名指李卓人喺社交平台，以社署津助院舍嘅個人護理員起薪點作比較係不合理及不正確。李卓人未搞清楚件事，就屈咗人嘞！

其實李卓人都唔係第一次搞到啲事唔清唔楚，好似之前搞海麗邨外判清潔工人罷工事件，其時有人質疑職工盟利用工人名義籌得廿幾萬，而扣除工人津貼，仲剩低唔少捐款，外界質疑職工盟藉工人名義籌款，但捐款就成為政黨未來工運經費，等同詐騙捐款人。職工盟其時發稿證實總共剩低近廿三萬元，聲稱會用作工人抗爭，絕不用於職工盟營運開支，李卓人其時話籌款時已講明餘額用途，海麗邨工人都知道，有關講法係侮辱工人喎。李卓人每次搞事都咁唔清唔楚，惹來咁多爭議，唔該佢自我檢討一下，到底係邊方面出咗問題啦！