中環出更：獨過情人節 何啟明元宵補祝
每逢情人節，唔少有情人嘅男士都要絞盡腦汁咁去氹另一半開心。而冇情人嘅都唔使愁，事關今年嘅情人節咁啱撞正年廿九，有部分人都會喺依啲日子食團年飯慶祝。不過，立法會議員何啟明就慘喇，雖然佢結咗婚，連仔都生埋，但係老婆同囝囝都返咗大陸，難怪佢大呻情人節好寂寞啦！
撞正老婆囝囝返大陸拜年
點解情人節會咁寂寞？啟明解釋，話因為撞正新年，老婆同囝囝趁情人節前返咗大陸拜年，初七先返港，所以唔止情人節，就連新年都係一個人過。至於一個人嘅情人節又有啲乜嘢搞作？佢話當日喺工作中度過，至於年三十晚當大家食緊團年飯時，佢就選擇一支公去咗睇戲喇！
咁會唔會補祝呢？佢話今年情人節慶祝唔到，或者留番喺正月十五嘅元宵佳節先慶祝。除咗嚟緊嘅元宵，下個月仲有白色情人節添，睇嚟啟明要把握好機會，計劃下點同老婆過喇！
卓妮