中環出更：「佔中」後移民增 關景鴻：校園風氣差
呢幾日唔少店舖陸續啟市，唔知新一年香港嘅市道好定唔好呢？咁啱喺沙田馬場見到做移民顧問嘅關景鴻話相信香港經濟仍會向好，對市道有信心，事關佢話同一四年「佔中」發生之後嘅兩年相比，舊年嘅移民人數減少咗，而且好多人移民嘅原因都係覺得現時嘅香港校園風氣有礙仔女學習，並唔係因為經濟唔好，反而近年查詢移民東南亞地區嘅人數多咗，例如去泰國、新加坡、台灣等地區投資移民，可見香港經濟唔單止冇變差，仲係愈嚟愈好添啊！
除咗多咗人想投資移民，零售業方面似乎都有唔錯嘅表現，做化妝品生意嘅葉俊亨就話對自己公司嘅產品充滿信心，特別係喺過去嗰幾日，公司嘅生意額都有明顯增長，有唔錯嘅成績。問到點睇成個行業嘅發展，佢話至少喺佢本行，即化妝品行業應該會發展得愈嚟愈蓬勃。
王庭聰鍾意留港過年
轉頭見到中華總商會選任會董王庭聰，佢就話留喺香港過年，得閒就行吓街，同朋友飲茶，實行全力振興香港經濟。佢話農曆新年外遊嘅話，周圍都係香港人，去到邊都覺得好逼，所以除咗以前父母鍾意返鄉下過年，會陪佢哋返去外，其實都鍾意留喺香港過年，除咗覺得舒服啲，仲可以留港消費，一舉兩得咁話！
香港愛馬女士協會主席葉思貝就話習慣每年新年都會外遊，今年就同老公去咗意大利玩足十二日，本身諗住喺西西里島享受陽光與海灘，但嗰邊天氣比較凍，結果同預期有啲出入，但佢話唔緊要，因為佢喺旅程尾站米蘭大肆Shopping補番數，仲話呢個先係旅程嘅重點。見佢消費力咁強，仲唔係因為香港經濟好嘅成果。
卓妮