政情：財神扮得多 柯創盛識舞獅頭
每逢大時大節，地區人士都忙於同街坊過節，而農曆新年就多數化身財神。從事地區工作多年嘅立法會議員柯創盛（柯仔），當然有豐富嘅扮財神經驗，但原來佢仲識得舞獅頭。柯仔尋日同洪錦鉉、張琪騰、歐陽均諾等觀塘區議員，趁正月初九社區仍有新年氣氛，喺觀塘區舉行財神巡遊活動。活動仲邀請區內一所小學嘅醒獅隊演出，大部分演出學生只學咗醒獅幾個月，但已經有板有眼，功架十足。
為街坊帶好意頭
柯仔就透露年輕時亦曾參與舞獅活動，佢當時年約廿歲，喺屋邨生活並擔任互助委員會秘書，所以農曆新年期間就義務為互委會到屋邨逐家逐戶舞獅，為街坊帶來好意頭。佢話舞獅頭前未有正式學過，只係「郁吓郁吓」，而表現「都可以喇」，但已經收到唔少利是。不過，柯仔話當時將所有利是錢都捐贈畀互委會，因為互委會只得實報實銷津貼，所以要幫補互委會嘅經費。