政情：勉港青衝出地球「吳得掂」
教育局前局長吳克儉（吳得掂）喺任內致力推動生涯規劃，兼且頻頻公幹似外遊，因而被戲稱為「旅遊局長」，而自去年退休後就更加攞正牌周遊列國。吳得掂尋日出席一個青年活動時，再大談生涯規劃，又分享退休生活繼續去日本玩，睇咗好多書，而最新搞作就係衝出地球，研究喺太空培植種子！佢下月仲會帶埋一班校長去視察太空種子培植計劃，等大家學多啲嘢咁話，香港嘅師生真係有福嘞！
吳得掂話，依家嘅年輕人要知嘅嘢好多，但資訊太多就會變成方向太多，然而Life Goal（人生目標）係一個好大同好廣闊嘅名詞，二十歲、三十歲同四十歲嘅目標都會唔同，所以要小心去定立人生目標，強調唔係定咗就不可動，目標會隨人生而改變。佢又話，做人唔止要Meaningful（有意義），更加要有Impactful（影響力），而香港好多年輕人成日打機，甚至被人話係「廢青」，但明白佢哋打機得到好大滿足感。
分享視察太空種子培植
吳得掂又自爆早前去日本，唔係單純去玩，亦有學嘢，而佢每次去日本都會行書局，咁有乜得着呢？佢話日本人已經講緊一百年後會做乜，每個範疇都有年輕人分工去做，所以搵自己鍾意做嘅嘢先係最重要！至於退休生活，佢話玩固然重要，但終生學習先係唯一能夠自保同保人嘅方法。
佢話內地航天科技發展好好，而內地人口眾多，食物需求會係一個問題，可以諗吓航天農業有無得搞，所以佢就去西安睇吓航天育種計劃，發現當種子喺太空面對失重、輻射、極寒同極熱後都無事嘅話，就會變成優質種子，返落地球種植可以發大十倍！
佢舉例話，地球南瓜種出嚟二十公斤重，上完太空就可以變成二百公斤，近期就有班大學生研究出成張書枱咁大嘅羅馬椰菜花，營養係原來嘅廿倍，佢自己前晚都食咗個，真係好食好多，味道都唔同啲！講咁多，吳得掂都係想講周圍有好多機會，鼓勵香港學生去爭取啫。睇嚟地球真係太細，吳得掂嘅宏觀角度已經衝上太空，唔知幾時會見到佢親身上太空培植種子呢？