開心嘅時光過得特別快，新春假期話咁快就講ByeBye。全港幼稚園生及小學生因應流感疫潮而提早放嘅年假亦告結束，部分學校今日開學，之但係流感仍然肆虐，復課後會唔會再爆大鑊，當局有冇足夠應變措施，唔到家長唔擔心o架。
呢，今次冬季流感來勢洶洶，年初至今累計有四百零七宗成人及兒童嚴重個案，二百三十八人死亡，包括兩名兒童，單係農曆年三十至年初四，流感已奪去四十二條人命，話流感殺人拍得住沙士一啲都冇誇張。雖然話提前放年假令到學校感染個案大幅回落，之但係目前香港仍處於流感高峰期，醫管局預計五月底先至緩和，就知呢場抗疫「持久戰」絕對唔係講玩。
可惜吖，班官講就口響，其實都係揸流攤嘅咋。既然明知呢場係持久戰，死得人多，點解唔一早做好應對措施呢？大家有眼見，一場冬季流感將公院亂象暴露無遺，由人手到床位再到疫苗都嚴重不足，醫護人員做到有氣冇碇抖，怨聲載道。醫管局話就話已特別動用九億元加強服務及為前線醫護人員提供加班津貼，但臨渴至嚟掘井，邊有好結果o架，有內科病房醫生喊咁口求救，話通宵當值嘅醫生得一個咁大把，每晚要應付數百名病人，甚至連心臟監察器呢啲基本裝備都不敷應用，證明當局所謂增撥資源幾咁缺乏針對性。
淨係講前日公院急症室求診數字吖，接近五千五百人次，轉送往內科病房超過一千人次，雖然叫做比前有所回落，但依然非常嚴峻，幾乎所有公院內科病床使用率超過百分之一百一十四，問你點頂。中大醫學院院長驚呼公院病房亂象「慘不忍睹」，查實呢啲亂象周而復始，每年流感高峰期都會重複上演，如果當局吸取教訓，及早做好防禦準備，又點會搞到一鑊泡吖。
睇到喇，官僚靠得住，豬乸會上樹。公院呢條抗疫防線明顯漏洞百出，加上前排江蘇確診全球首宗甲型禽流感H7N4感染個案，連本港專家都好擔心會成為風土病，尤其係內地春運猶如「人類大遷徙」，啲病毒會唔會四處散播，殺埋入香港，真係冇人講得埋。所以話，市民必須提高警惕，加強個人衞生，而學校更需做多幾重防疫措施，千祈咪一開學就賴嘢吖。
都係嗰句嘞，黃台之瓜，何堪再摘。香港正值多事之秋，淨係應付呢場流感已經搞到倒瀉籮蟹，手忙腳亂，萬一再有乜嘢新型病毒拍門，真係隨時瓜得。唔該港產官僚醒醒定定，痛定思痛，唔好再攞市民條命仔較飛吖。