政情：利敏貞鳳袍加身 邱騰華讚有時裝觸覺

邱騰華當日同利敏貞一齊會見傳媒，即使利敏貞嘅衣着非常令人注目，邱騰華依然氣定神閒，向公眾公布《廣播條例》同《電訊條例》第一階段檢討展開為期三個月公眾諮詢。而邱騰華尋日出席活動時被問到對「鳳袍」嘅睇法時，就大讚對方以華服示人，恰如其分，更認為利敏貞有「Fashion Sense （時裝觸覺）」，仲話：「著衫有亮點，講嘢有重點。」力撐下屬。

陳百里尷尬答非所問

至於商經局副局長陳百里亦多次被問到對利敏貞裝束嘅睇法，佢嘅表情則顯得相當尷尬，答非所問。佢不斷背稿講商經局政策，包括《廣播條例》同《電訊條例》修訂嘅公眾諮詢，同埋迪士尼利潤計算方法等，又話唔識評論其他事情，睇嚟佢示範緊乜嘢叫有口難言！