政情:容海恩驚嫁唔出 麥美娟願掩護

我哋早前邀請香港術數家協會術數師楊子東為幾位女議員算過桃花運,其中新民黨容海恩(Eunice)嘅桃花運會「見光死」,工聯會麥美娟(Alice)嘅真正姻緣就最快要到二○二○年先成事。睇完師傅指點,Eunice話新年流流睇到覺得好驚,即刻打電話畀Alice問佢點算,Alice就無有怕講明幫手做掩護,等Eunice快啲嫁得出。

Alice尋日笑住話叫咗Eunice唔使怕,有乜嘢事可搵佢做掩護,以後Eunice一拍拖就幫手搞Party,食飯去街三人行。佢仲估Eunice會快過佢出嫁,已講明要做姊妹咁話。不過Alice話依家揚開咗就掩護唔到,戲稱點解Eunice咁蠢講畀大家知喎。至於Alice自己嘅桃花,佢話已呼籲所有朋友準備「彈藥」,到二○年嫁得出就做人情,嫁唔出就畀佢當係「慰問金」,去食餐勁都好過無喎。

容慨嘆男士見佢彈開幾呎

另外,聽聞Eunice趁假期同男友去咗旅行,問到係咪真有其事,Eunice即刻話唔講,有得去都唔去喇!佢又笑稱為咗要嫁得出,以後所有花邊嘢都唔講,仲要將朋友收埋喺地底,全部都玩地下情。

Eunice仲慨嘆,之前傳出緋聞後,依家一眾男士見到佢都彈開幾呎,所以佢以後有乜嘢都拉埋Alice去,仲要借埋Alice嘅愛犬出街,一於三人一狗出巡,實唔會「見光死」嘞!

第一手消息請下載on.cc東網iPhone/iPad/Android/Windows Phone Apps