政情：娥姐捉緊侯強手肘 做「背後嘅女人」
上水鄉事委員會主席侯志強（侯強）尋日喺新界鄉議局團拜活動後，竟然遭一名中國籍女子捉緊手肘，仲匿喺其身後，到底侯強背後嘅女人係邊個呢？
好多政界人士同地區人士都有出席尋日嘅活動，所以有立法會補選候選人到場，好似西貢區議員方國珊。另一候選人陳玉娥（娥姐）都一早到場，活動完結近一小時仲未離開，等到大批鄉紳結伴離開時就上前打招呼。
而娥姐行蹤遭傳媒發現時，即刻緊握侯強手肘同匿埋，令侯強成為繼「娥頸橋之戀」後另一名男主角，難怪連蛇都唔驚嘅侯強都一臉尷尬喇！佢最後以幽默化解，笑問算唔算遇到性騷擾？又話示範何謂有膊頭喇！擾攘一輪後侯強終於甩身。其他新界東候選人為黃成智、鄧家彪、趙佩玉同范國威。