中環出更：開台爭拗 阿姐發火 西九跪低
西九文化區管理局早前因為冇邀請被視為香港粵劇界唯一獲承認嘅工會「八和會館」，統籌同參與戲曲中心開幕禮，結果畀八和會館主席汪明荃（阿姐）炮轟，話佢哋根本冇照顧到業界，係「有事鍾無艷，無事夏迎春」！阿姐尋日喺新春團拜中話經過溝通後事件已解決，八和會館將負責戲曲中心開台日同開台周嘅表演。呢次擺明係西九管理局知衰跪低喇！
阿姐重申「開台」係粵劇界隆重嘅傳統儀式，藉以祈求演出安全順利，如今八和會館參與開台演出，將係「第一身用場」，將戲曲中心變成表演場地。佢又話西九管理局已接受有關意見同安排，惟目前尚未簽訂協議，有待細節落實後先簽署。問題解決咗，阿姐都輕鬆晒，仲同西九委任外籍表演藝術總監方美昂（Alison Friedman）、表演藝術行政總監茹國烈合照添！
馬逢國指粵劇市場會更蓬勃
同場見到立法會體育、演藝、文化及出版界議員馬逢國，佢話戲曲中心落成後，粵劇界就有新嘅場地用，相信能夠吸引更多年輕人欣賞同參與！佢仲話粵劇嘅市場冇想像中咁細，淨係鍾意唱粵劇嘅已有幾十萬人，鍾意睇嘅更加不計其數，佢細細個都睇粵劇長大，相信呢啲非物質文化遺產一定可以承傳落去，仲會愈嚟愈蓬勃添！
王賢誌將首穿粵劇服裝演出
東華三院副主席王賢誌坦言對粵劇唔太熟悉，但係嚟緊四月東華換屆，佢上任做主席之後隨即會搞一場粵劇籌款晚會，到時仲會粉墨登場。佢話以前都試過唱粵腔，但今次係佢第一次正式換上成套粵劇服裝演出，笑指仲需要好多人指點，而佢亦會嘗試喺東華轄下嘅學校物色對粵劇有興趣同有天分嘅學生，培訓佢哋成為粵劇界嘅未來之星咁話喎。
卓妮