中環出更：會員急增廠商會多辦活動交流
香港中華廠商聯合會（廠商會）舊年因為舉行換屆選舉，令新入會會員數量激增千幾人，雖則商會實力大增，但咁快速擴大會員規模始終唔係太健康。身兼廠商會會員事務委員會主席嘅副會長吳國安話，新增咁多會員，服務亦需跟上，所以嚟緊會多舉辦活動，加強溝通。
廠商會早前舉行新一屆會董會就職典禮，會長吳宏斌同九位副會長開心上任。吳國安話因應會員增加，必須加強會員之間交流同溝通，下個月就會舉行《行業「商‧對論」》暨春茗聯歡晚宴，仲會請埋堪輿師同大家講吓流年同投資之道。佢又希望未來以每年增長一成嘅速度吸收新會員，嚟緊亦會多舉辦交流活動，探討點樣應對多變嘅營商環境。
李秀恒卸任後去古巴玩
「升呢」做永遠名譽會長嘅李秀恒，卸下會長一職之後，終於有多啲時間去做自己喜歡嘅事，例如攝影。佢笑笑口話過年期間會同一班攝影發燒友，包括康泰旅行社創辦人黃士心等人去古巴、墨西哥玩，睇嚟又會影唔少靚相嘞！而喺旁邊嘅保安局局長李家超，聽見李秀恒等人去玩就好羨慕，事關佢農曆新年冇得放假，要留守香港。
當日到場嘅仲有強積金管理局主席黃友嘉、副會長黃家和同兒子黃浩鈞、副會長盧金榮同爸爸盧文端等人。副會長陳國民就話過年期間同副會長史立德等幾個家庭一齊去日本度歲，充吓電再返港搏鬥過。
卓妮