中國人向來講究「禮尚往來」，相信「投之以桃李，報之以瓊瑤」。可惜理想同現實完全兩回事，中國人肉包子打英國狗，對方唔單止一去冇回頭，仲回敬最毒「黃蜂」尾後針，問你死未！
功夫茶講嘅呢隻「毒黃蜂」，之唔係人稱「河童」嘅黃之鋒囉。有英國傳媒引述「毒黃蜂」指，香港已經到咗危急關頭，希望英國政府盡快公開大批同香港有關嘅解密檔案，務求令香港殖民地時期嘅歷史曝光云云。明眼人一睇就知，所謂「還原歷史」只係幌子，實際上無非為「港獨」、「自決」從歷史故紙堆中尋找「理論基礎」。
大家有眼見，英國首相文大嬸最近訪華，雖然唔肯為「一帶一路」戰略背書，又對香港事務指指點點，但中方仍然禮送千億訂單，點知英國人多謝都冇句，轉個頭就放「毒黃蜂」針人，變臉仲快過翻書。一聽到河童要求公開「解密檔案」，英國前外相立即一唱一和，呼籲有關當局優先處理，擺明打龍通。
話時話，包括河童以及「雙學三犯」另一成員周永康在內嘅本土派，舊年已經着手喺英、美等地搜集檔案，企圖搞搞震，獲得當地大學同政府部門大開方便之門，唔少名牌教授瞓身支持，可見呢隻「毒黃蜂」雖然黑頭髮、黃皮膚，其實早就經過英、美基因改造。
可能有人會話，「蚍蜉撼大樹，可笑不自量」，小小一隻「毒黃蜂」，惡得咩出樣？嗱，呢鋪講法要戒嘞，《聖經》裏面嘅巨人歌利亞夠強壯喇啩，最終咪又係畀大衞一粒石仔搞掂；再講吖，巨人畀「毒蜂」針多兩針，就算只係癬疥之疾，不足致命，但搞到成隻豬頭咁起勢咁（抓）痕，淨係個狼狽相都笑大人個口喇！
咁又係吖，小毒蜂，嗡嗡嗡，唱兒歌就話得意啫，「毒黃蜂」，嗡嗡嗡，巨人攞機關槍掃佢又唔係，搵手拍又隨時針多幾嘢，都咪話唔頭痕。仲有唔好唔記得，類似「毒黃蜂」呢類吃洋人奶水嘅小漢奸，喺香港要幾多有幾多。只要道德冇底線，肯拋個身出嚟，唔理你係讀書不成嘅廢青，抑或要靠「偉哥」振雄風嘅孱青，洋大人一律照單全收，重用有加，封你做「思想家」又得，提名你攞諾貝爾獎又得，連收留你着草都得。耐唔時放幾隻毒蟲出嚟針人咬人，容乜易蟻多摟死象（口架）！
所以話阿爺今次老襯就係咁解。大筆大筆錢送畀美國佬、英國佬使，到頭來畀人搞番轉頭，同搬石頭砸自己腳冇乜分別。中國「站起來」、「富起來」卻「未強先軟」，唔怪得區區一隻「毒黃蜂」都敢恰到你上頭上面喇！