政府喺月底會公布新一份嘅財政預算案，而財政司司長陳茂波（波叔）早前已自爆庫房收入較高，尋日有會計師行亦預期盈餘遠超預期，可能高達一千八百億元，創回歸以來嘅歷史新高，仲形容盈餘係小型海嘯添！老實講，政府年年計錯數，依家唔止係庫房水浸咁簡單，而係海嘯咁冚過嚟，浸死波叔咁滯，睇嚟波叔呢次唔放水都唔得，冇得再耍花招搞期望管理唔派糖，亦咪使旨意再撳住個荷包嘞！
