政情：發叔話預算案應「量出為入」
團體「107動力」尋晚舉行十周年晚會，當中嘅「107」指《基本法》第一百零七條，點知活動嘉賓、前立法局主席黃宏發（發叔）上台致詞就話「一○七條係個笑話嚟！」
按《基本法》第一百零七條，「香港特別行政區的財政預算以量入為出為原則，力求收支平衡，避免赤字，並與本地生產總值的增長率相適應。」而發叔就話自己主力教公共財政制度、香港政制、政策分析，香港唔係量入為出，係量出為入。
發叔解釋，逢係做預算案必定計算要使幾多錢，再睇收入夠唔夠，唔夠錢去借都要，舉例七十年代前財政司夏鼎基借錢去填沙田第一城塊地，賣完地先還錢，但依家香港政府好少咁做。
指庫房水浸可減稅
佢仲用業主立案法團做例，法團好多錢剩都唔會使晒，唔係交管理費嘅負擔壓力就好大，量入為出係講一個家，一個人無咁多錢唔好充大頭鬼，但管法團、管國家就唔係咁，認為支出係可以用政策控制，如果政府再管埋投資，用主權基金到處亂玩，市民好快要承擔稅務問題。對於依家庫房水浸，佢話唔係叫政府一筆過派晒錢畀市民，亦唔係退稅，係應該要減稅至約百分之十五就夠。