政情：張炳良返「娘家」執教鞭 盼參與研究工作
張炳良未入「熱廚房」之前，係香港教育學院嘅校長，依家升格咗做大學，已卸任運輸及房屋局局長嘅佢亦重返「娘家」執教鞭，尋日履新出任公共行政學研究講座教授，咁啱就撞到教大校董會主席馬時亨，仲同教大現任校長張仁良短敍吓添！馬時亨又話若果日後張炳良主持演講，佢定必到場支持，睇嚟真係好捧場喎。
時任教育學院校長嘅張炳良，為學院升格大學做咗好多工夫，今次重返娘家，佢希望日後參與教大喺香港同大中華研究嘅工作，整理佢喺運房局局長五年嘅決策經驗，以豐富喺管治同公共政策方面嘅理論同實踐思考，仲會從事專書寫作，同埋按大學嘅需要參與一啲本科或研究生教學活動。
馬時亨指教師要有企業家精神
馬時亨佢尋日擔任教大通識課程嘅主講嘉賓，同學生分享企業家精神。佢喺開場白提到做教師同做企業家一樣，都需要善於同人溝通、樂於同人合作，最重要是胸襟廣闊，樂見學生、下屬青出於藍，佢希望同學們都擁有企業家的精神，以培育下一代為己任，做一個引以為傲嘅老師。