政情：出動臭魚追按金 劉頴匡無人理
早前遭取消參加立法會補選資格（DQ）嘅劉頴匡，尋日又出動臭魚，上門去搵新界東選區選舉主任兼沙田民政專員陳婉雯，不過最後都係無功而回。睇嚟佢未攞得番選舉按金，反而蝕埋值四百幾蚊嘅罐頭錢。
劉頴匡喺上星期嘅補選候選人簡介會中都出動過臭魚，而尋日又再重施故技，去到位於沙田政府合署內嘅民政事務總署門外開臭魚，不過十幾分鐘後就遭清潔人員清走，但走廊仍然保留殘餘味道，期間現場唔少人臭到要帶口罩。
蝕埋四百幾蚊罐頭錢
而劉頴匡出發前話呢次目的係想了解被DQ原因，亦要申請領回五萬蚊嘅選舉按金，因為年近歲晚咁話。佢仲話罐頭有「世界第一臭」食物之稱，所以想同陳婉雯分甘同味，又認為選舉已經腐爛不堪，希望陳可以感受市民嘅難受喎。不過，最後行動都係失敗收場，因為佢等到民政事務署收工都見唔到陳囉，仲要蝕埋價值四百幾蚊嘅臭魚罐頭添！