政情：修訂企業扣稅拖十年 吳永嘉接棒追瘦劉怡翔
《稅務條例》第39E條多年嚟都係工業界嘅一大掣肘，立法會工業界（第二）前議員林大輝早喺十年前已開始爭取修訂，事關呢條條例係講香港企業喺香港買咗一啲機器之後，如果將啲機器運到香港境外用，就冇得享有相關嘅稅務扣減，增加咗工業界嘅成本，可惜有關條例嘅修訂一直冇進展。雖然大輝已退咗落嚟，但接棒嘅吳永嘉會重新包裝繼續爭取修訂，希望呢個「馬拉松式」修訂可以「衝線」，睇嚟係要咬住財經事務及庫務局局長劉怡翔唔放嘞！
大輝在任兩屆議員期間，逢親喺會上遇到時任財經事務及庫務局局長陳家強，次次開火，追住要修訂39E，曾經搞到陳家強黑臉反擊，有次休會辯論針對公職人員嘅暴力行為，大輝又乘機砌陳家強，話如果打人真係有用的話，佢第一個會打陳家強，仲要打完心口打背脊，打到佢遍體鱗傷，此話一出，全場爆笑，可見大輝憎陳家強憎到出晒面。雖然大輝已卸任，陳家強亦已離開熱廚房，但唔代表39E嘅爭議完結。事關身兼香港中華廠商聯合會政治及經濟事務委員會主席嘅吳永嘉會接手大輝嘅任務，即係會繼續追瘦劉怡翔。
指兩條稅務條例與國策矛盾
吳永嘉話39E嘅修訂唔係乜嘢新鮮事，但近年國家推出咗「一帶一路」同粵港澳大灣區兩項國策，鼓勵港人到內地發展，令有關條例嘅修訂就愈嚟愈急切，所以佢就再次提出修訂，仲連埋關於知識產權稅務扣減嘅《稅務條例》第16EC條，希望可解決兩條條例同國策互相矛盾嘅問題。
佢仲話修例除咗係希望成本低啲，仲係因為想解決「唔公平」嘅問題！因為基於轉讓定價法例，如果間公司嘅業務橫跨幾個唔同稅區，政府評估間公司嘅整個生產鏈時，係會將公司有冇提供機器、知識產權去外地納入考慮範圍，但講到稅務扣減嘅時候就唔納入，係「雙重標準」，難怪工業界一直都要修訂呢條條例啦！
政府回應正面 修訂有望「衝線」
點樣修訂有關條例？佢話可放寬一啲條例下嘅定義，例如香港公司喺其他地區設廠，例如啲機器係免費畀相關嘅工廠使用，就應該喺「租約」嘅定義入面剔除，咁佢哋就可享受番相關嘅稅務扣減。佢仲話啲建議已畀咗財政司司長陳茂波，但未有答覆，估計佢仲要同特首傾吓點處理先，但佢話政府過往回應都正面，相信今次可以「衝線」，唔會好似以前大輝咁一直「馬拉松式」咁爭取！