中環出更：谷氣谷脹咗自己 楊潤雄唔想「豬圓肉潤」
教育局局長楊潤雄尋日向記者大派揮春又拎出一張寫住「豬圓肉潤」揮春，佢笑言因為見到揮春有個「潤」字配合佢個名，所以就買咗嘞！但佢又好矛盾，話唔想自己「豬圓肉潤」，因為升任局長之後，自覺肥咗好多，估計同工作繁忙、少做運動、多應酬，同埋成日谷氣「谷脹咗自己」有關。究竟乜嘢令佢咁谷氣呢？佢就點到即止，無講埋落去喇！
特色菜單宣傳教育政策
傳媒午宴喺職業訓練局舉辦，話要支持吓啲學生。楊潤雄同一班團隊就諗咗「教育特色菜單」，前菜係「凱撒歸凱撒、教育歸教育沙律」，湯就係「優質幼教小白兔甘筍湯」，主菜係「教育資源綽綽有『魚』」，甜品係「教育成『果』甜絲絲」，順便為教育政策賣吓廣告。
楊潤雄早前喺工展會嘅社企攤位，買咗好多由新生精神康復會出售嘅手工藝布揮春，每個揮春都繡上一個造型可愛嘅卡通公仔嚟代替其中一個字。佢尋日就畀記者抽揮春迎春節，睇吓大家嘅運氣如何？
同時佢拎出一個「豬圓肉潤」揮春，透露自己最近肥咗好多，所以都唔太想祝自己「豬圓肉潤」，又話曾經諗過送畀傳媒，但又覺得無人會鍾意被祝賀「豬圓肉潤」，所以惟有留畀自己，佢又話農曆年留港休息。
卓妮