中環出更：購物城有客冇舖 象哥急推免租救亡
每逢歲晚，都係零售業當旺嘅日子，但上周六開始試業嘅新田購物城，就反而出現門庭疏落嘅場面。購物城嘅大旗手、立法會進出口界功能組別議員黃定光（象哥）急於救亡，除咗要求已簽租約嘅商戶簡化裝修工程盡快開業，又即日開始實行免租政策直至四月一日，務求舖租賣大包以吸引更多商家租用購物城。
象哥尋日出席工聯會搞嘅獨居長者團年宴時，承認試業首天的確人流稀少，而翌日進場嘅客流雖然多咗，約有千二人，有商戶一日嘅營業額高達三萬元，但亦收到唔少投訴話店舖太少。佢話購物城目前開業嘅店舖只得廿三間，僅佔整個購物城店嘅舖數量十分一左右，若果歲晚同新春期間都持續呢種情況咁就真係大件事嘞！
何啟明話位置遠 要考慮交通費
咁購物城呢種傳統嘅零售模式，喺網購嘅潮流之下係咪顯得不合時宜呢？象哥就好有信心咁話唔會。儘管年輕人熱衷於網購，但佢認為傳統嘅店舖零售，畀顧客喺付款之前能夠睇到同觸摸貨品嘅質感同各種設計特色，呢種購物體驗係網購難以提供。
之不過，立法會勞工界議員何啟明就係經常用網購，話某啲零售店舖搵唔到嘅貨品型號，往往喺網購就可以買到，加上物流業嘅興盛發展，貨品亦好迅速就送到指定地點，若果係需要貨品好快到手嘅話，咁當然係要幫襯實體店啦，所以傳統嘅零售店舖仍有存在嘅意義。家住旺角嘅佢話購物城地點係比較「隔涉」，習慣市區購物嘅消費者若要前往購物城，除物價外，交通費支出亦係一項考慮。
黃傑龍亦覺網購難取代實體店
稻苗學會會長黃傑龍（Simon）亦都覺得網購唔會完全取代實體店，佢話尤其喺食品方面，傳統嘅店舖零售更能畀消費者信心，例如賀年糕點必須喺店舖售賣，惟有咁至可以為顧客帶嚟「新鮮炮製」嘅感覺。
卓妮