「諾貝爾大減價益你阿爸！」功夫茶唔係亂唱o架，呢首廟街飲歌改幾粒歌詞之嘛，即刻好切合諾貝爾和平獎大貶值呢個不堪嘅事實。如果唔係，點會連黃之鋒呢啲小洋奴都話有資格攞獎吖。
近排香港群魔亂舞，妖氣沖天，漢奸黎單政治黑金案獲律政司放生已令全城嘩然，點知外部勢力仲要乘機踩多幾腳，十二名美國參眾議員失驚無神致函諾貝爾和平獎委員會，話要提名「雙學三子」黃之鋒、羅冠聰、周永康角逐今年諾貝爾和平獎喎，理由係「佢哋以和平手法為香港爭取政改及自決，保障香港獲聯合聲明保證嘅自治」，真係唔知畀佢哋嚇死，知就畀佢哋笑死。
先唔講呢三位小弟弟根本爭取唔到政改，就講所謂嘅「和平手法」已經夠好笑嘞。係人都知，佢哋吹雞揭開為期七十九日嘅佔領序幕，唔止暴力衝擊政總前地，仲引發警方施放催淚彈，佔中期間商戶生意一片死寂，社會撕裂更係不在話下，何來和平呢？再講吖，佔中衍生鳩嗚同埋旺角暴亂，一次比一次暴力，和平喎，咪玩喇。
至於話佢哋「保障香港獲聯合聲明保證嘅自治」就仲好笑，係笑中有淚嗰隻呀。正正因為佔中挑戰一國，嚴重損害國家主權，北大人先至一再強調「全面管治權」。問心吖，佔領一役後，中央對香港嘅管治係嚴咗定鬆咗，係收緊咗定放寬咗，咪知佔領之亂同埋呢幾條友仔有幾好帶挈囉。
所以話啫，提名佢哋攞諾貝爾和平獎喎，咪即係自降身價兼侮辱和平兩個字。試諗吓，以前攞呢個獎嘅包括紅十字會之父亨利‧杜南，獲封聖嘅德蘭修女，仲有結束南非種族隔離政策嘅曼德拉等，要佢哋淪落到同雙學三子齊名，你話係幾大侮辱呀。咁當然，近年諾獎變質變味，早已淪為政治獎，公信力大減，連「政治喇嘛」達賴都有份攞獎就知喇。為咗打擊中國崛起，落北京嘅面，擺幾個小洋奴上枱，真係冇乜出奇o架。
既然係咁，就唔應該只有三位小洋奴獲提名喎，一班大半生致力做漢奸走狗嘅反對派政客，個個都應該獲表揚至啱，好似李漢奸、民主阿婆、歪嘴主教同漢奸黎呢班「搞事四人幫」，舐洋主子鞋底舐咗咁多年，點可以冇份呢？一味表揚小洋奴而忘記大漢奸嘅貢獻，都好唔公道啫。
大家睇到喇，今時今日做洋奴漢奸真係高人一等（o架），有錢有面唔在講，只要氹得洋主子歡喜，隨時水鬼升城隍。不過話時話，佔中其實都係照抄佔領華爾街，美國佬與其提名幾個香港仔，點解唔益自己友呢？都係嗰句，己所不欲，勿施於人吖！