一個不濟，另一個更不濟。冇錯！老朽係話緊林鄭用人不察，之前一個袁國強做咗律政逃兵，任內一味和稀泥瞎扯「證據太多」分析需時，結果漢奸黎於違法佔中期間，被本報踢爆多次秘密捐款予泛民政黨及立法會議員，惟袁國強呢位前律政司司長好似食足十擔豬油，對捲入捐款醜聞嘅漢奸黎遲遲冇任何行動，令佢逍遙法外。最終袁國強拍拍屁股走人，留下一堆「蘇州屎」予僭建醜聞纏身嘅下任鄭若驊！
誰知僭建風波未平息之際，鄭若驊突於上任第廿七日拍板放生捲入秘捐案嘅漢奸黎，一句「證據不足」，連涉嫌接受捐款的多名現任及前任立法會議員亦全部被放生，阿姐，家陣做功德法事咩？而係涉及維護法治核心價值嘅時候，涉及法律面前人人平等嘅時候，涉及司法公平公正嘅時候，涉及大是大非嘅時候，豈可一句「證據不足」就連檢控都無就速速放生？小市民如老朽只好仰天長嘯：「善惡到頭終有報」係呃人嘅！香港號稱是廉潔、法治嘅文明城市，原來只是一座建在沙堆上的堡壘，不堪大風一吹就冧！
輿論炮轟林鄭政府弱勢兼錯估形勢，委任鄭若驊出任律政司司長係「用錯人」，鬼咩！林鄭一味搞「和諧新風」，根本就係想明哲保身，一個有作為、嚴謹、稱職的領導人，必須在面對艱難抉擇時不怕反對勢力，如今竟無能到一味「放生」，任由反中亂港勢力坐大，犧牲法治精神，助長漢奸黎繼續販獨，睇怕中央依然信林鄭管治有效，必定後患無窮！
古人說，德不稱位，能不稱官，賞不當功，刑不當罪，不祥莫大焉。今林鄭連「官到無求膽自大」的一團火也沒有了，任用一個己身不正嘅鄭若驊，一來就玩「放生養奸」，這不正是「廟堂之上，朽木為官；奴顏婢膝之徒，紛紛秉政」嗎？香港回歸後之所以動盪不安，「愛國愛港就死得」，源頭不是很清楚嗎？