政情：財會進度慢 陳健波火都嚟
立法會財務委員會主席陳健波（波哥）早前因做身體檢查而無法主持會議，相隔兩星期再主持會議嘅佢，就好似食咗火藥咁。尋日財委會舉行四小時會議，但只能夠完成審議兩個項目，所以波哥好急躁，會議只係開咗一個鐘，就叫議員避免再問相同問題。議員郭家麒就唔太滿意，叫波哥唔好做咁多無謂嘢，點知因此辣着咗波哥。
郭家麒勸量吓血壓
波哥一輪嘴咁講到「紅都面晒」，強調佢有責任提醒議員，反問郭家麒點解會變咗鬧主席，直指郭離晒譜，仲警告話唔守規矩就趕佢走。郭家麒見到波哥咁激動，無佢咁好氣，就叫一向血壓高嘅波哥量吓血壓喇！
雖然郭家麒自動停火，但波哥仍然火遮眼，直指唔知議員做乜喺度問無謂嘢，仲掉轉槍頭叫列席嘅官員簡單答就得，唔好嘥時間，甚至對住發言嘅官員連聲講「時間夠喇」、「叫你停就好停」，好令人側目。