政情：大嶼山發展 邀李國麟做委員獻計
政府日前公布大嶼山發展諮詢委員會委任八名新委員，任期兩年，至二○二○年一月三十一日止，當中包括立法會衞生服務界議員李國麟，真係令人有啲驚奇，衞生服務界同大嶼山發展有咩關係？
原來想聽醫療方面意見
李國麟接受查詢時話，佢獲邀出任委員嗰一刻同樣有呢個疑問，不過對方回覆佢係想喺醫療方面聽多啲意見。咁樣聽落都有道理，因為北大嶼山醫院早前被審計報告話空置率高，有部分設施三年都未啟用，的確需要衞生服務界畀啲意見嘅。
此外，民主黨立法會議員尹兆堅接替黨友胡志偉出任新委員，連同以往都係委員嘅民建聯議員陳恒鑌及工聯會議員麥美娟，即係有三名新界西直選議員加入委員會，睇嚟都係考慮到地利之便喇。