中環出更：立會質詢衝擊區會事件 黃國健疑似爆粗
香港眾志常委周庭早前遭港島地方選區選舉主任鄧如欣裁定，取消其立法會補選參選資格後，日前一班泛民欲旁聽鄧如欣會出席嘅東區區議會會議，惟最終演變成衝擊。公民黨立法會議員陳淑莊尋日喺內會會議上，動議於下周三大會就有東區區議員被身份不明人士阻礙開會一事，提出緊急口頭質詢。工聯會黃國健質疑事件同立法會有咩關係，指東區區議會嘅人士或會心諗「關你嘟事」，疑似爆粗。
黃碧雲要求澄清「嘟」字意思
黃國健疑似爆粗後，民主黨黃碧雲隨即提出規程問題，要求黃國健澄清「嘟」字嘅意思，惟黃國健回應指「任佢（黃碧雲）諗啦」。兼任東區區議員嘅工聯會郭偉強、批發及零售界邵家輝就喺會上講述事件，話當日周庭等人嘅旁聽證係以他人名字登記，因此保安未有放行。議員劉國勳就認為，區議會係要討論社區事務，希望議員唔好將區議會事務放喺立法會討論。
人民力量陳志全就話，曾經喺立法會申訴部處理西貢區議會職員阻礙區議員進入區議會事件，認為立法會並非完全無角色處理事件，若喺立法會提出口頭質詢，有助釋除疑慮，避免悲劇重演。惟該動議最終被否決。
卓妮