中環出更：仁濟封存時間囊賀金禧 嚴玉麟難忘沙士年
仁濟醫院董事局早前舉行慈善晚會慶祝五十周年金禧大日子，現場展示一批舊錢箱、護士制服等「歷史文物」，令賓客彷彿行入時光隧道。好多前主席都返嚟懷舊一番，包括現任主席嚴徐玉珊嘅老公嚴玉麟（Stanley）及王子沐等人。○三年沙士爆發時做主席嘅Stanley話，當時以為籌款會好難，但結果成績唔比往屆差，印證香港人好齊心，好有獅子山精神，令佢畢生難忘。
王子沐就指住着舊護士制服嘅模特公仔話，套制服係廿幾年前佢做主席時換嘅。當時護士制服係好傳統嘅白色，佢認為要搞創新，所以請時裝設計師劉培基設計呢套混合卡其色同水綠色嘅新制服，笑稱病人望見都會開心啲。
梁栢賢慶幸醫院無變專科
不過王子沐任內最難忘嘅事唔係換制服，而係當時醫管局要求仁濟由普通科醫院改為婦兒產專科醫院，惟包括院方、居民同區議會都大力反對，佢仲親自上陣解畫，最後終於成功維持現狀。醫管局行政總裁梁栢賢聽完笑稱未聽過呢段古，不過就話好彩改唔成，因為唔符合發展趨勢喎。
嚴徐玉珊親手封存時間囊
合和集團主席胡應湘太太胡郭秀萍、已故遠東發展創辦人邱德根太太邱裘錦蘭都有現身，佢哋都做過仁濟主席，當晚同嚴徐玉珊等人一齊見證別具心思嘅時間囊封存儀式。眾人分別放入具紀念性嘅物品，包括一九七三年仁濟醫院開幕特刊、已有四十年歷史嘅總理盃足球賽紀念章等，嚴太就放入新鮮出爐嘅《仁濟金禧誌》，並親手為時間囊上鎖封存，唔知呢一幕會唔會係佢任內最難忘嘅一刻？
卓妮