阿爺成日話，堅持以愛國者為主體嘅港人治港，發展壯大愛國愛港力量，講就好聽咯，實際上邊個信就邊個笨實嘞。睇吓一班洋奴漢奸副得戚樣吖，二十一年來呼風喚雨唔在講，犯咗法一樣唔使上身；反觀愛國愛港人士長期備受打壓，仆心仆命換來一殼眼淚，咁嘅回歸，搵你要咯。
淨係一個漢奸黎咋，翻手為雲覆手為雨，回歸前固然打橫行，回歸後更加肆無忌憚，吹雞佔中又得，黑金政治又得，恐嚇記者又得，僭建完再僭建都得，得咗。點解可以咁惡？多謝律政司喇。尋日廉署話已就漢奸黎單政治黑金案完成調查，律政司認為冇足夠證據提出檢控，放生喎。
都見怪不怪咯，反對派不嬲獲司法優待，長毛收黑金都冇事，身為金主嘅漢奸黎當然有免死金牌喇。咁又係嘅，連佔中呢個奪權大陰謀，律政司一句「證據太多」，漢奸黎呢隻幕後黑手又可以逍遙法外，呢個世界仲有乜嘢事係冇可能吖。家陣港獨歪風吹遍香江，後生仔一個二個走上前台反中亂港，唔係無原因o架，根本就係港府以至中央一手造成。唔係咩，成個香港亂晒龍，黑白顛倒，以醜為美；違法無事，執法有罪；罪犯仲被吹捧成英雄添，後生仔唔有樣學樣至奇。
所以話啫，立咩《國歌法》啫，立咩廿三條啫，冇用o架，香港一日由洋奴漢奸把持，反中亂港者一日有司法金鐘罩保護，立一百條法都係嘥氣。尤其係律政司有眼無珠，法律唔係用嚟獎善懲惡，而係用嚟包庇護短，香港妖氣沖天、不見天日就係咁解。話時話，不近情者多藏奸，律政司突然放生漢奸黎單政治黑金案，時間上真係好巧合，全世界都知律政司司長鄭若驊僭建單嘢不斷發酵，爛果報係最大推手，如果話咁啱得咁蹺，當中冇古怪，你信唔信吖。
幾時都話，堡壘最易從內部攻破。鄭若驊上任唔夠一個月，除咗僭建醜聞一大籮，「頭炮」就係放生漢奸黎，令人見識到何謂「反中亂港過到骨，愛國愛港就死得」，嚟緊仲有大把燙手山芋等佢處理，當中又以《國歌法》同廿三條立法最受阿爺重視，不過莫講話立咗法一樣可以有法不依，到底立唔立得成法都有疑問，呢位大姐靠唔靠得住，手指拗出定拗入，心中有數喇。
講到呢度，功夫茶不禁諗起《義勇軍進行曲》，中華民族已經到咗最墮落嘅時候，起來嘅唔止係不願做奴隸嘅人們，仲係飽受奴役嘅愛國愛港人士，每個人被迫發出最強嘅吼聲，再唔用重炮打倒洋奴漢奸，打倒港英餘孽，萬眾一心前進，香港唔使旨意有運行吖！