政情：有相為證：項明生帶義工赴緬甸 為災民建屋
緬甸喺○八年遇到一場風災，令到大批居民失去家園，為咗令災民得以安居，唔少團體都希望出一分力，好似香港仁人家園就搵咗啲年輕人去幫災民建屋，日前仲委任咗旅遊達人項明生做仁人家園嘅建屋大使，帶領一班香港青年義工去緬甸落手落腳起屋。
民風淳樸 曾三次深度遊
項明生去過好多地方，但呢次去緬甸建屋原來係佢首次去海外嘅慈善活動，佢話以前去過緬甸三次深度遊，覺得當地民風淳樸，亦係佢最喜愛嘅東南亞國家之一，仲話能夠為佢嘅「愛人國度」出一分力，感到好開心。
呢次緬甸建屋之旅為時一個禮拜，班青年義工會喺當地落手落腳興建竹屋同木屋，當然唔少得要擔擔抬抬喇，工序包括切竹、紮竹、鋸木、搬木同搬運建築材料等。老實講，班義工未必有呢類建屋經驗，所以到時會有專業人員喺旁邊指導，確保大家安全兼起嘅屋夠紮實，令災民有安居之所。