政情：勞工權益亂叫價張超雄又捱插
打正旗號以爭取工人權益為宗旨嘅工黨，得唔到市民支持，由上屆立法會有四名議員，今屆變咗一人黨，佢哋嘅議員張超雄喺多項勞工權益嘅議題獅子開大口，鑊鑊都弄巧反拙。好似立法會尋日審議監管外傭中介公司濫收佣金嘅相關條例草案，張超雄又亂叫價，畀勞工及福利局局長羅致光狂揼，炮轟佢提出嘅修訂本末倒置。呢啲咪叫做自己攞嚟衰囉！
《2017年僱傭（修訂）（第2號）條例草案》早喺舊年六月就喺立法會首讀同二讀，政府原定六個月檢控時效，因為草案委員會上有唔少議員反映時間太短，所以政府遞交修正案增至十二個月，可惜張超雄死心不息，見政府肯讓步就再還價要求延至廿四個月。殊不知，政府唔理佢，佢就提多個修正案，喺尋日草案喺立法會恢復二讀辯論時，公開向政府討價。
羅致光炮轟張修訂本末倒置
羅致光都忍唔住喺發言直指張超雄嘅建議同政府鼓勵受屈求職者盡早提出投訴嘅原意相違背，而且時間拖得耐，證據就會流失、證人記憶亦會模糊，令到調查人員搜證困難，而且要求咁高變相要求外傭中介公司延長存檔時間，加重行政負擔。羅致光強調係深思熟慮，諗過度過先決定唔採納張超雄嘅建議。張超雄畀人話完都未醒水，仲將全球關注嘅「#MeToo」事件做類比，指明性侵案無時效，唔會因為證據流失唔去追查，當然都冇人睬佢，最終草案獲得三讀通過。
獅子開大口 逼「復職令」繼續拖
除咗呢條例草案之外，本來仲有討論咗廿年都未推到出台嘅「復職令」可以恢復二讀，就係因為張超雄提修正案要求僱主無履行命令時，額外支付僱員的款額由僱員每月平均工資的三倍提高至六倍、取消七萬二千五百元上限等，統統都要求過高，兼未喺勞顧會內討論，逼到政府撤回草案。咁搞法，又唔知要拖幾耐？
其實早有政府中人話張超雄「行得太快」，政府呢頭回應訴求讓步，嗰頭佢就獅子開大口，再叫高啲價！人哋啱啱做完嘢，你又叫第二樣，點合作啊？張超雄做事太離地，未學行就先學走，搞到工人權益一鑊泡，香港工人真係多得佢唔少囉！