中環出更：張宇人做微創 笑言變「無膽」匪類
長者有病痛真係在所難免，早已攞咗長者咭、身兼行政會議成員同立法會飲食界議員嘅張宇人自爆，上星期因為膽痛入院，預約下個月微創割膽，笑指即將變成「無膽匪類」。不過佢就似乎唔擔心，仲笑指「大佬，我好多老友都冇咗膽啦」，又講笑話割膽後，唔知「會唔會驚到震，乜都講晒畀你哋聽呢？」
膽石問題困擾多年
張宇人透露，上星期有一晚覺得好痛，食咗胃藥、止痛藥，約凌晨一點幾仍未能止痛，就自行駕車去醫院，點知急症室要佢等三個鐘，「我入嚟急症室，你叫我等三個鐘頭咪死得囉」，佢即刻致電相熟醫生求救，該醫生估佢膽有事，搵醫護人員幫佢打止痛針，結果住咗一晚醫院，又幫佢照晒其他嘢，發現佢膽發炎，醫生開咗一星期消炎藥畀佢，如果當晚即做手術，就唔可以做微創，所以佢就預約下個月做。
佢話有膽石問題多年，過往都有去行會召集人陳智思喺泰國嘅醫院驗身，醫生已幾次叫佢割膽，佢都冇聽，點知依家出事，反而花多咗錢。佢又透露，自己早排患上筋膜炎，做完衝擊波又覺得冇乜事，但尋日朝早起身都覺得腳跟後方有事，依家都未搵到原因。聽落佢真係病痛多多，要好好保重身體啦！
卓妮