中環出更：考紀律部隊肥佬 曾國衞自爆衰面試
近年紀律部隊份工受到好多年輕人歡迎，後生仔壯志凌雲原本係件好事，之不過好多人過唔到體能測驗嗰關。卓妮早前喺保良局慈善步行活動上見到入境事務處處長曾國衞、警務處副處長趙慧賢等紀律部隊高層，同佢哋傾開呢個話題時，曾國衞就話考入境處嘅人未必衰體能，其實面試嗰關都唔易過，佢當年考紀律部隊時就係喺最後面試階段肥佬喇！
曾國衞笑笑口自爆當年第一次考紀律部隊時，筆試、體能都過關，但到咗最後面試時就衰咗，惟有畀心機準備好啲再考過。佢笑稱自己身上有好多勵志嘅故事，經常失敗咗再起身，例如考大學時數學攞最低分嘅「擔梯」（H），後尾查卷就變成C，不過都係讀唔到心水學系。
保持體能 趙慧賢勤做運動
趙慧賢就話當年考試好輕鬆就過關，其實依家啲後生仔未必係做唔到，只要練多啲、相信有意志力就可以克服。雖然當年狀態咁勇，但係佢依家坐寫字樓多，要保持體能都唔容易，所以佢就好勤力做瑜伽、打羽毛球，有時間就行吓山。
同場仲有保良局總理鄧宣宏雁嘅老公鄧鉅明，最近經常喺保良局嘅活動上見到佢，反而唔見佢太太。
太太開會 鄧鉅明「代妻從善」
鄧鉅明笑笑口話太太去咗雲南開會，所以由佢「代妻從善」。一向鍾意講笑嘅佢仲話最近同老婆有分工，佢負責吃喝玩樂，至於開會、交租出糧就交畀老婆喎，真係搞笑。
今次慈善步行主題係「開心型狗年」，事關嚟緊新年係狗年。好多人會避忌同自己相沖嘅生肖，布置家居時唔敢亂咁擺，保良局總理陳黎惠蓮分享話，佢聽從高人指點，喺屋企掛一個十二生肖齊晒嘅擺設，咁就百無禁忌，鍾意擺乜就擺乜喇！
卓妮