過氣財爺鬍鬚曾雖然人走茶涼，但留低嘅蘇州屎到家陣仲要人執手尾，真係多得佢唔少。係呀，講緊嘅之唔係佢老哥自視為政績嘅美食車囉，呢個先導計劃唔經唔覺推出接近一年，係時候總結吓嘞，可惜成績唔多見得人喎。
旅遊事務署係咁講嘅，計劃自去年二月推出以來，十五部美食車表現參差，截至去年底有三部美食車總收入介乎二百萬元至二百五十萬元，已經係表現最好嘞，最差三部嘅總收入低於一百萬元。如果以場地計算，表現最亮眼係迪士尼樂園，總收入過千萬元，但表現最差嘅觀塘場地，收入只有四十六萬元咁大把，經營者蝕到凸呀。
即係咁，做生意想丁財兩旺，天時地利人和缺一不可，迪士尼樂園之所以一枝獨秀，全賴嗰度旅客多多，又冇乜食肆競爭，美食車自然生意滔滔。之但係迪士尼樂園只此一家，其他美食車停泊地點門堪羅雀，好明顯喇，美食車表現好唔好，場地係最大關鍵。經營者一直要求當局放寬場地限制，殊不知官老爺愛理不理，結果生意愈做愈見鬼，再咁落去，收檔都有之。
嗱，當局終於知衰嘞，再推出四項優化措施亡羊補牢喎，包括唔再限制美食車必須停泊喺指定地點，只要經營者搵到合適地點，得到場地負責人同意，唔阻塞交通，當局會考慮批准；仲有增加新田購物城兩個美食車泊位等，總算聊勝於無喇。
其實功夫茶一早鐵板神算喇，洋為中用唔一定萬試萬靈，更多時候只會水土不服，原因一字咁淺，環境唔同囉。歐美幅員遼闊，隨時行十條街都搵唔到一間食肆，美食車行到邊停到邊，自然客似雲來；香港就唔同講法，地少人稠不特止，五步一老麥，十步一茶記，根本唔愁搵食，加上美食車食物售價唔係特別親民，新鮮感一過自然無以為繼。呢，唔夠一年已先後有三架美食車止蝕斬纜離場，就知有幾惡啃喇。
見微知著，美食車出師不利，反映港產官僚做事「堅離地」，一味閉門造車。而且唔止美食車係咁，好似當局最近將俗稱「牛肉乾」嘅違例泊車罰款大幅調高，以為可藉此解決違泊問題，但就冇諗過違泊係由泊位不足引起，根本係倒果為因；又好似置業階梯係就係五花八門，名堂多多，但土地冇增加，房屋問題咪又係喺番度。
話時話，內地官場有所謂拍腦袋決策，拍胸脯保證，拍屁股走人，事實證明港產官僚都係一擔擔嘅咋。所以話啫，當局閉門造車呢鋪癮一日唔改，就算吹水吹到天花龍鳳都係嘥氣！