前財政司司長曾俊華（鬍鬚曾）二○一五年喺財政預算案失驚無神拋出美食車概念，由商務及經濟發展局前局長蘇錦樑（Greg蘇）牽頭落實有關工作，直至去年以先導計劃推行。不過急急出台嘅美食車，市民就彈多過讚，當中最大敗筆係只能喺指定場地開檔，但係當局揀嘅地點唔少都係人流稀疏嘅「死場」，令到部分經營者年收入一百萬元都冇，甚至紛紛退場唔玩。現屆政府依家就急急補鑊，研究點樣拆牆鬆綁，已經拍拍籮柚走人嘅鬍鬚曾同Greg蘇真係好帶挈嘞。
