政情：梁卓偉爆曾許諾 只做一屆官員
政商界人士近年加入政府呢個熱廚房，真係少啲承擔同政治勇氣都未必可以成事，○八年擴大政治委任制度後嘅首批副局長、現任港大醫學院院長梁卓偉，尋日出席一個座談會時大爆當年，即一二年中離開官場嘅內幕，原來係同一早自我承諾，只做一屆政府任期有關。
梁卓偉於○八年加入政府成為食物及衞生局副局長，而於一一年九月更上一層樓出任特首辦主任，適逢一二年七月政府換屆，當年政圈對梁卓偉去留版本甚多，其中一個說法係梁卓偉未獲邀請留任，因此毅然離開政府，事隔近六年，梁卓偉出席座談會同學生對話時，親自剖白當年嘅心路歷程。
「人在江湖」 少陪家人
梁卓偉自爆，早於港府推出首屆問責制之時，已有人搵佢加入政府，最終當時冇加入，不過佢一直自我承諾即使加入政府，亦只會做一屆政府任期。佢續稱，數年前其實獲邀過渡至一二年一屆政府，只係佢選擇秉持做一屆嘅承諾，以便返回港大為同事籌募研究經費，做過去未完成嘅工作。
談及家人同朋友，梁卓偉自言較少時間留畀佢哋，即使一早同朋友約定見面，好多時都會「甩底」，至於自己電話訊息打得最多就係「人在江湖」呢四個字，好在大家見到都會體諒咁話。