政情：劉慧卿呻林健鋒十年未「找數」
前立法會議員劉慧卿（卿姐）同商界立法會議員林健鋒（Jeffrey）唔止係舊同事，仲係同鄉，佢哋均為廣東南海人，尋日Jeffrey應邀出席卿姐嘅網台節目大談最近政經熱話，之不過卿姐一見Jeffrey就呻，話Jeffrey曾講過大家係同鄉，會帶佢去食鄉下菜，點知就十年都去唔到。卿姐今次於節目開到聲，唔知Jeffrey幾時先「找數」呢？
網台節目談政經熱話
尋日卿姐一見到Jeffrey，就如數家珍提及對方嘅銜頭，包括議員、行政會議成員及全國政協委員，又趁機問及Jeffrey，點睇中央同香港呢個冰河時期，Jeffrey就話，如果唔上嚟節目又會畀人話疏離，卿姐反應甚快，直指「疏離到唔恨，離地添喎！」
Jeffrey續稱，其實現屆政府已經伸出咗橄欖枝，民主派好多要求都已答允，政協委員同立法會一樣都係橋樑，希望可以向中央反映港人意見。佢仲話自己已經搞緊粵港澳大灣區考察團，希望北京兩會後可以成行喎，真係信不信由你嘞！